එංගලන්තය ඇතුළු විදේශයන්හි දී ඔබ ලැබූ ද්වීතියික ඉංජිනේරු ආධ්‍යාපනයත් යුරෝපයේ සහ ලොව අනෙකුත් රටවල ඔබ ලද අත්දැකීමුත්  සමඟ සැසඳීමේ දී අද ලංකාවේ සූර්යබල තාක්ෂණය ක්ෂේත‍්‍රය ලබා ඇති දියුණුව පිළිබඳව ඔබට කිව හැක්කේ කුමක්ද ? 

ඇත්තෙන්ම සූර්ය බල උත්පාදනයට අවශ්‍ය පරිසර සාධක සීමිත එම රටවල්, මෙම තාක්ෂණය උපරිමයෙන් භාවිතා කර එහි ඵලප‍්‍රයෝජන ලබමින් එම ක්ෂේත‍්‍රය දියුණු මට්ටමකට ගොඩ නඟාගෙන තිබෙනවා. අද ඔවුන්ගේ අරමුණ  දැනට ක‍්‍රියාත්මක න්‍යෂ්ටික සහ ගල් අඟුරු ඇතුළු පොසිල ඉන්ධන බලාගාර භාවිතය
ක‍්‍රමයෙන්  ඉවත් කර විකල්ප මාර්ග ලෙස හරිත බලශක්ති ප‍්‍රභව වැඩිදියුණු කිරීමයි.

ලංකාව ගත්කල අප තවම සිටින්නේ මෙම ක‍්‍රියාවලියේ මූලික අවස්ථාවක. අප අද  නූතන විකල්ප බලශක්ති
ක‍්‍රම භාවිත කරන්නේ අපේ බලශක්ති අවශ්‍යතාවන්ගෙන්  සියයට පහකට අඩු අගයක් නිපදවීමට පමණයි. මෙය සියයට තිහක අගයක් දක්වා ඉහළට ගෙන ඒමට අපට පහසුවෙන් පිළිවන්.

තාක්ෂණික වශයෙන් සැලකීමේදී අප අද භාවිත කරන විකල්ප බලශක්ති තාක්ෂණ උපක‍්‍රම වල හෝ උපාංග වල  විශේෂ අඩුපාඩුවක් මම දකින්නේ නෑ. මේ ක්ෂේත‍්‍රයේ සාපේක්ෂ අඩු වර්ධනයට හේතුව, අවශ්‍ය රාජ්‍ය අනුග‍්‍රහය සහ නීති පසුබිම සකස් වීම ප‍්‍රමාද වීමයි. ඒ වගේම පසුගිය දශකය දක්වාම මෙම තාක්ෂණයේ, මූලික පිරිවැය අප වැනි සංවර්ධනය වන රටකට දැරිය නොහැකි ඉහළ අගයක පැවතීමත් මෙයට හේතුවක් වුනා.

සූර්ය බලශක්ති ආයෝජනයේ යෙදීමෙන් ඉහළ සහ ස්ථාවර ප‍්‍රතිලාභ ලබාගත හැකි ආකාරයේ ජනාවලියක් ඊට අදාළ  රාජ්‍ය ආයතන මගින් පසුගිය දා එළිදැක්වූවා. නමුත් තවමත් මෙම වැඩපිළිවෙළ පිළිබඳ පැහැදිලි
අදහසක් ජනතාව අතර නෑ. 

ඇත්තෙන්ම මෙය සරල කාරණයක්. පිටරට වලදී මෙය අප ජාලය පෝෂණය (Feed in Tariff) ලෙස හඳුන්වනු ලබනවා. අපි හැමෝම දන්නවා දැනට අප භාවිත කරන විදුලිය අපට ලබා දෙන විදුලි ජාලය පෝෂණය වන්නේ විශාල ප‍්‍රමාණයේ ජල, ගල් අඟුරු සහ ඞීසල් බලාගාර වලින් බව. මෙම නව වැඩපිළිවෙළ තුළ අප කරන්නේ අපේ නිවාස පියැස්ස මත සූර්ය පැනල පද්ධතියක් ස්ථාපනය කර, එයින් නිපදවන විදුලිය අප විදුලිය ලබා ගන්නා රැුහැන තුලින් ම නැවත ජාලයට ලබාදීමයි. සරලව කීවොත් අපේ නිවාස පියැස්ස කුඩා විදුලි බලාගාරයක් බවට පත් කිරීමයි.

මේ කටයුත්තට සහභාගි වෙන්නත් වෙනුවෙන්  ආකාර කීපයකට වාසි ලැබෙනවා. අපේ විදුලි බිල වැඩි නම්
(රුපියල් 4000 ට වඩා*  එය රුපියල් 30/- දක්වා අවම කර ගැනීමට හැකි වීම මින් මූලිකයි.